سنة اولي مباحث

سنة اولي مباحث
الحلقة الاولي
صيام المباحث
يوم وقفة رمضان دخل الملازم اول محمود والمنقول حديثا معاون مباحث للقسم علي المقدم علاء رئيس المباحث وبيده طلب اجازة دورية لمدة شهر ويحاول تقديمها له للموافقه عليها فاشار له علاء بالجلوس وهو منهمكا بالحديث التليفوني وينتظره محمود ويدعو الله في سره ان يوافق له رئيس المباحث علي طلب الاجازة .
علاء – خير يا محمود بيه .
محمود – انا بس عاوز اقدم لحضرتك اجازة دورية لمدة شهر..
يضحك علاء مقهقها بشكل هيستيري باين عليك بتهرج دا انت لسه مقضتش معانا شهر في المباحث وعاوز تاخد اجازة شهر د انا بقاللي عشرين سنه خدمه ماخدتش اجازة شهر
انا عاوز احكيلك علي حكاية صغيرة - انا فاكر لما خلفت بنتي كنت لسه متعين رئيس مباحث جديد و طلبت اجازة 3 ايام وقاللولي لازم تروح تقابل مدير المباحث ولما رحت اقابله سالني عاوز الاجازة ليه وقلت له بكل برآه لان مراتي خلفت بنت وعاوز اقعد مع المدام 3 ايام وكانت المفاجئه انه قطع الطلب وطلب يعملي تحقيق لاني مبشفش شغلي ومش فاضي غير للخلفة والتزويغ وقاللي عشان كده انت بتسيب القسم وتروح كتير اللي بيشتغل في المباحث ينسي الدنيا ويتجوز المباحث ولو مش عجبك انقلك المرور او الترحيلات ورمي الطلب في وشي.... لكن انت مقلتليش عاوز الاجازة ليه خير
محمود –ابدا انا عاوزها عشان اقضي رمضان في الصوم والصلاة في هدوء بعيد عن المباحث والقسم والكلام اللي سيادتك عارفه.
علاء ساخرا – ليه هوه الشغل في القسم بيمنع الصيام ولا بينقض الوضوء وايه الكلام اللي انا عارفه؟
محمود – انا مقلتش كده ابدا لكن الشغل بتاعنا مينفعش مع الصيام يعني ازاي اكون صايم واعلق واضرب الناس واكهربها
علاء يضحك بهستيرية وسخريه – كويس قوي ايه رايك لو قفلنا القسم في رمضان عشان صايمين ؟
باين عليك حتتعبنا معاك يابو حنفي ومش قادر تفهم شغل المباحث انا حفهمك هوه الدكتور لما بيفتح بطن مريض وهوه صايم عشان ينقذ باقي جسمه من المرض بيفطر ؟
محمود – لا طبعا
علاء – تمام هوه ده شغلنا احنا كمان لما بنعلق عيل مجرم ولا واد صايع من بتوع الفيس بوك ولا نكهرب حرامي عشان نجيب المسروقات او واحد عملي صحفي وبيطول لسانه علي الحكومه و الداخليه وعملي وطني وخايف ع البلد والكلام الفارغ بتاعهم ده احنا بنحمي منهم البلد لان دي عيال فاضيه مش عاوزه تعيش وتسيب الناس في حالها وعاوزين يولعوا البلد وهمه شوية لمامه وكلهم عملاء لاسرائيل والامريكان واحنا لما بنعمل كده بنحافظ علي امن البلد وسلامتها وده شغلنا هوه فيه بنا وبينهم لاسمح الله اي مشاكل شخصية ولا حاجه ده شغلنا يامحمود واحنا ملناش اي مصلحة في اي حاجه.
محمود – ل طبعا يا افندم انا فاهم ان ده شغل لكن اللي اعرفه ان الصيام مش عن الاكل والشرب بس لكن عن اي شئ بيأذي الناس ؟
علاء – باين عليك حتتعبني معاك احنا لما بنضرب او نعلق او نفلق او نكهرب ده في مصلحة الناس عشان البلد متولعش ولا انت عاوزها تبقي فوضي وشوية الرعاع دول يحكموا البلد ويسجنونا ولا انت مصدق حكاوي حقوق الانسان والافلام الهندي دي الي حتودي البلد في ستين داهيه ؟
محمود - انا قصدي اخد اجازة عشان اقرا قرآن واواظب علي الصلاة والصوم وانا من حقي شهر اجازة في السنه وبعدين ارجع الشغل تاني بعد رمضان
يدق جرس التليفون – لا لا ياحاج دومه انت باين عليك خسعت معانا قوي ده كلام ياراجل باعت الشنط كلها بلح وكمان مش ابو تريكه وعين الجمل باعته بقشره والفستق واللوز بقشره ايه اللي حصلك هو احنا عندنا وقت نقشر عين جمل وفستق د احنا يدوب بنفطر ع الواقف وننزل جري ع المكاتب وبعدين ايه الكميات اللي انت باعتها دي حتكفي مين ولا مين مانت عارف انا بوزعها ع القيادات والهي العظيم ما بينبني حاجه ده المفتش لو وديت له حاجه من اللي انت باعتها دي كان ينقلني بكره الصبح للمطافي لا انت مبقتش دومه بتاع زمان انا مستني الشنط بتاعة القيادات واللي انت باعته حوزعه ع الامناء والمخبرين ده كلام يا راجل سلام ويغلق التليفون ويوجه كلامه لمحمود
راجل بيستهبل قرفنا كل شويه وعامل فيها شيخ عرب علي قفانا وكل شويه ينطلنا في القسم طلع الواد فلان والواد علان علي شوية بلح وشوية عين جمل وكمان بقشره الناس جرالها ايه والمصيبة عاوز يبقي كفيل هوه فاكر كفيل دي ببلاش ده وانا في القسم التاني كان عندي الحاج صاموله الله يمسيه بالف خير ويفك سجنه كان كفيل تمام اي حاجه نطلبها كان يجبها فورا وكان كل يوم يبعت عشرة كيلو كباب وفاكهه للقسم وعشرة كيلو كفته للمخبرين والعساكر وفي رمضان كان كل واحد بيجيله شنطه متقلش عن خمسين كيلو وكان يستنانا لحد منخلص الخدمه ونطلع نسهر في احسن الاماكن مش الحاج دومه الجربان فاكر انه حيبقي كفيل ببلحتين المهم
محمود – يعني ايه كفيل ياباشا؟
علاء – الكفيل ده الاسم الحركي الجديد لاصدقاء الشرطه دول ناس ليهم طلبات بسيطه عند المباحث عشان يرسموا بيها ع الناس في المنطقة ويعرفوهم انهم ليهم علاقه بالقسم وساعات بيكونوا ناس طمعانين يرشحوا نفسهم ف المحليات ولا في اي حاجه تانيه وزي مانت عارف الدنيا شايلني واشايلك هوه حد حمار معاه فلوس مش عارف يوديها فين واحنا ده حقنا انت عارف الدوله يا دوب بتدينا مرتبات بالعافيه ولازم الناس دي تساهم في رسالة الامن مش بيقولوا المجتمع المدني لازم يشارك الحكومة همه بيشاركوا تمام والكفيل ده هوه اللي يخلص لك كل حاجه انت عاوزها وده حقك لان ظباط المباحث مش فاضيين للحاجات الصغيرة دي يعني لو عاوز تصلح عربيتك او تشطب شقتك او حتي عاوز تفرفش شويه همه بيتولوا الكلام ده وده شرف ليهم والكفيل انواع وانت لازم تظبط لك كفيل ولا اتنين عشان تفضي نفسك لشغلك كنا بنقول ايه؟
محمود- ابدا كنا بنتكلم ع الاجازة ؟
علاء – انت لسه فاكر انسي يابو حنفي كلمة اجازة دي خالص انت مكملتش شهر في المباحث ومفيش حد في المباحث بياخد اجازات وقلتلي ليه عاوز الاجازة ؟
محمود – عشان رمضان
علاء – افتكرت انت شاكلك كده مش حتنفع معانا في المباحث وباين عليك قلبك خفيف امال كنت قالب الدنيا علي دماغنا وجايب وسايط الدنيا ومكلم طوب الارض عشان تشتغل في المباحث وبعدين تقولي مش عاوز اضرب ولا اعلق ولا اكهرب وحرام وحلال وصلي وصوم ايه انت فاكر نفسك جي مباحث الازهر يعني احنا كفرة وانت اللي تعرف ربنا مانا قدامك بصلي وبعد الصلي بقوم اشوف شغلي وبضرب وبعلق بنفسي بعد ما شوية العيال الامناء اللي جوه بقي محدش يآمن لهم وبيصوروا بعض بالموبيلات والفضايح بقت علي الموبايلات وع المخروب النت
ولازم تفهم يابو حنفي ان الضرب والتعليق والكلام ده مش حرام لا في رمضان ولا غير رمضان لان ضرب وتعذيب المتهمين ده اسمه شغل عشان مصلحة المجتمع كله وعشان الناس تعيش في امان وهيه دي رسالة الشرطة الحقيقية . هوه احنا لما بنضرب محامي ولا صحفي ولا عيل من العيال بتوع حقوق الانسان ولا الفيس بوك فيه بينا وبينه حاجه لا سمح الله دول شوية ناس مخها ضارب عاوزين يعملوا بلبله في البلد وقال ايه حقوق انسان وحقوق بذنجان وديمقراطية وكلهم شوية عيال صيع يستاهلوا الموت مش بيقولوا اطيعوا اله والرسول واولي الامر منكن اهو احنا اولي الامر منهم ولازم يسمعوا كلامنا ولا هيه سايبه .
ع العموم لو انت عامل مؤمن قوي وخايف علي صيامك قوي انت تنزل خدمات الصبح وتيجي تشتغل مع العيال دي في القسم بعد الفطار وكده ميبقاش فيه مشكله. بيتهيالي ان الضرب و الكهربا بعد الفطار متفطرش ولا اقولك انت تبتدي الشغل من بعد العشاء لحد قبل الفجر ويبقي كده تمام .
يدخل احد المخبرين حاملا كراتين كثيرة ويقول الحاجه شرشر باعته الياميش بس مش عاوزه تدخل القسم عشان لابسه مش ولا بد ويقوم بالدخول اكتر من مرة محملا الكراتين
والله بنت حلال الحاجه شرشر ويدق جرس التليفون ع المحمول ويرد علاء والله فيكي الخير وصاحبة واجب دايما ياحاجه ويتحدث وهو يعاين الكراتين فعلا دايما سباقه للخير وذوقك عالي دايما فعلا هي الدي الناس اللي بتفهم هوه الحلو يجيب الا الحلو بالمناسبة اكيد حتبطلي ف رمضان عشان الشهر الكريم و الجماعه حيروحوا لاهاليهم ايوه يا سيدي يا بختوكم حتاخدوا اجازة الدور والباقي علينا
ويسكت ليتلقي الاجابة ازاي هوه فيه حد بيفرفش في رمضان ايوه يعني بيكون شغل خارجي تيك اواي في الخيم الرمضانية بس فعلا كلام معقول ماهو بعد الفطار وقبل الفجر مفيش مشكله بس انا مش عاوز اي مشاكل في رمضان ياحاجه علي فكرة البت اللي بعتيها اخر مرة دي كانت مش في المستوي وبتتكلم كتير هوه انا عندي وقت للكلام احنا مش فاضيين للكلام احنا شغلنا مش مدينا حتي فرصه للمزاج علي فكرة دايما اطلبيني ع الرقم ده وبلاش تليفون المكتب ايوه هو ده رقمي الجديد ماانتي عارفه انا بغيره كل شهر و كل ما بغيره بديكي الرقم الجديد التليفونات محدش يضمنها اليومين دول
ماله البواب عامل مشاكل مع البنات والزباين معذور لسه جديد وجي بطينه بكره يتعود ويتلحلح اصله صعيدي انا حتصرف متشغليش بالك بحاجه سلام ويرن الجرس ويدخل المجند ويطلب احد المخبرين اطلع هات البواب بتاع العمارة 15بالذوق من غير شوشرة وينصرف المخبر
ايوه يابو حنفي كنت بتتكلم في ايه ؟
محمود – ابد انا كنت بفكر حضرتك...... ويدق جرس التليفون
علاء – حالا ياباشا كله تمام حبعت لحضرتك البوكس والسواق حالا احنا في الخدمه ورجالتك دايما ياباشا، اصناف معتبرة ولو اي شئ معجبش المدام نقدر نغيره فورا احنا لينا بركه غير سيادتك يا افندم حالا حيكون البوكس عندك المهم رضا سيادتك علينا هوه احنا عايشين الا بحسك معايك ياباشا .
ويدق الجرس ليطلب المجند السائق ايه يابن ال..... وال..... علي طول نايم مبتشبعش نوم بس فالح عاوز انزل اجازة في رمضان طيب وحياة امك مفيش اجازات ايه يعني هو انت فاهم انت بتشتغل في طابونه انت في المباحث ياحيلة امك خد كرتونتين واطلع للباشا في المديرية ولو قالك وديهم البيت وديهم وترجع علي طول وخليك فاتح الجهاز بتاع العربيه .
وينصرف المجند السائق .
ايوه يابو حنفي ع العموم انا عارف انك راجل محترم ومتدين وده انا بحبه فيك ربنا يقوي ايمانك ع العموم انت حاول متغلطش ومتشتمش حد ومتسبش الدين لحد طول ما انت صايم يعني لحد آذان المغرب علشان متفطرش وخلي الشغل بتاعنا بعد الفطار مبسوط يابو حنفي انت بتفكرني بنفسي اول ما اشتغلت في المباحث كل حاجه في اولها صاعبه لكن بعد كده حتتعود زي الدكتور اول مره لما يمسك المشرط ويفتح بطن المريض بيكون خايف وبعد كده بيبقي عادي ده شغل يابو حنفي
محمود – ينظر له في دهشه ولا يجد مايجيب به عليه
علاء – عملت ايه مع الواد بتاع الفيس بوك لازم نبعته امن الدوله جاهز ولا عاوز يقولوا علينا تلامذه ملناش في الشغل انا عاوز اعتراف كامل وتجيب اسامي باقي العيال اللي معاه كلهم وتنزل تجيبهم من بيوتهم بس خليك حريص حد يصورك ولا حاجه ومتنساش تجيب الكومبيوترات ولو لقيت لاب توب هاتوا انا احرزه بنفسي ، ده حيبقي كويس في حقك وانت عارف انا راجل بلمع الناس اللي بيشتغلوا معايا و بدي كل واحد بيشتغل حقه مين عارف ممكن تترشح لامن الدوله لما يشوفوا مجهودك ونشاطك بس خاليك حريص واقفل الباب عليك وانت بتكهربه وابقي حط علي بقه بلستر عشان الصوت ومتخليش حد م المخبرين او الامناء يدخل عليك وانت شغال معاه او يصورك بموبايل دول عيال زباله مبقاش لهم امان فين ايام زمان كنا لو عيل فيص في ايدينا نرميه في اقرب خرابه او اي ترعه ولا من شاف ولا من دري وبعد كده نطلع نعمل محضر عثور علي جثه ونخلص بيها من عيل شقي تاني كان الشغل ميه ميه مش دلوقتي كل شويه عاملين غاغه علي كل عيل ملوش لازمه بيموت، هوه احنا يعني قاصدين نموت حد هيه العيال اللي بقت صحتها وحشه مبتستحملش زي زمان كتهم القرف عاملين مجرمين وسياسين وهمه بيموتوا من اول تعليقه انا فاكر المتهم من دول كان يتعلق ع الباب بالساعة ولحام صدره ميفكش دلوقتي ميستحملش يطلع ع الباب خمس دقايق عيال تعبانه عندهم انيميا وعاملين رجاله ويقولك بيغنوا في حب مصر امال احنا ايه بنكره مصر ووقتنا اللي بنضيعه ده مش عشان مصر وامان مصر
علي فكرة الصحافة والاعلام خربوا البلد وحيولعوها ع العموم انا متاكد انك حتبقي ضابط مباحث عشرة علي عشرة وسيبك م الكلام الفارغ اللي في دماغك وبص لمستقبلك انا بعتبرك زي اخويه وعاوزك تبقي ظابط جامد وتعمل اسمك من دلوقتي بالمناسبة متنساش تاخد لك كرتونه من بتوع رمضان .
محمود – شكرا انا مش متجوز حعمل بيها ايه ؟
علاء –هادي بيها حد حبيبك او حد من اهلك دي حاجات بتيجي في المناسبات يعني هدايا بسيطه والنبي قبل الهديه مش كده - ولو مش عاوز يبقي عاوز حقك ناشف وانت تتصرف ع العموم مفيش مشكله ويخرج له ظرف مقفول ويقول له كل رمضان وانت طيب
محمود – لا شكرا
علاء – ع العموم انت حر عملت ايه في الواد اللي وقع من ع الباب طلعه بره القسم ووديه الشقه وخلي الممرضة تعدي عليه كل يوم بس اوعي حد من اهله يعرف حاجه عن مكانه وعين عليه الامين صبحي والامين عباس وخلي بالك وانت بتعلق المرة الجايه التعليق ليه اصول ومده محدده وتخلي بالك وانت بترفعه ع الباب ولما تربط اديه تبقي تربطها بفوطه قطن عشان متعلمش في اديه علامات عشان لو قال اي كلام في النيابة وعرضوه ع الطب الشرعي ميلقوش فيه اي اثر ع العموم انا عارف انك اسد وقلبك حديد ولسه بتتعلم بس خلي بالك المره الجايه
علي فكرة شيل الكرباج من المكتب خليه في عربيتك او خبيه بعيد عن المكتب هوه وماكنة الكهرباء عشان لو جه تفتيش من النيابه ولا حاجه يبقي المكتب نضيف .
محمود – يوجم قليلا ويكتشف ان علاء يهدده باصابتة الشخص المصاب الذي تسبب في اصابته .
علاء – اما بالنسبة للفطار متحملش اي هم ولاد الحلال كتير وبيبعتوا احلي اكل في الدنيا كباب وحمام وخضار دول ناس اصحابنا من اصدقاء الشرطة ، السنه اللي فاتت مراتي عمرها ماطبخت في رمضان كل اكلنا علب من اللي بتيجي للقسم وبعدين انا عاوزك تبقي ناصح و تحوش مرتبك عشان تقدر تكون نفسك عشان تعرف تتجوز ولا ناوي تفضل عازب وتبقي زبون عند مدام شرشر . الاحترام لازم لظابط المباحث والحاجات دي تبقي مجرد فرفشه بس لما تكون متضايق ولا حاسس بالملل وتبقي في الخباثه ومحدش يعرف عنك حاجه غيري لان ضابط المباحث ملهوش غير بيته وعياله عشان ربنا يسترها معاه ولا ايه رايك. لازم تعرف ان ظابط المباحث الناجح هوه اللي تبقي سمعته وايده نظيفة ومحدش كاسر عينه وسمعته زي الجنيه الذهب
محمود – طبعا يا افندم اهم حاجه الالتزام والاحترام .
علاء – بلاش كلمة الالتزام دي لاحسن يقولوا عليك ملتزم وانت عارف امن الدوله بتعمل تحريات علينا حافظ علي كلامك ولا عاوزهم يقولوا عليك ملتزم يعني متطرف ।

يدخل احد الامنا مضطربا حريقه ياباشا في الفندق وناس كتير بيبلغوا انها جامده قوي
واحنا مالنا عندهم المطافي والنجدة وبعدين م الفندق فيه شرطة السياحه هو احنا حنلاحقها منين ولا منين حاجه تقرف بلغ المأمور ولا النائب احنا عندنا شغل وتشكيل عصابي من بتوع الفيس بوك .
محمود – لكن يافندم انت عارف القيادات ممكن تروح ولازم حضرتك تروح وخصوصا البلد هايجه ع الحرايق بعد موضوع مجلس الشوري والمامور روح من بدري .
علاء – كل حاجه علي دماغ رئيس المباحث علي رايك ناس فاضيه هوه يعني كان مجلس ابوهم عالم ميعجبهاش العجب ولا الصيام في رجب يقعدوا يقلولك مش عاوزين المجلس وانتخاباته مزورة ولما يتحرق يقعدوا يعيطوا عليه ويعملوا عليه قصة عالم مورهاش غير الكلام وبس مايحمدوا ربنا انه اتحرق هوه كان اصلا بيعمل ايه – هات البوكس ولم المخبرين اللي عندك وكلم رئيس الدورية خلينا نشوف القرف ده كمان اصل احنا ناقصين حرايق كمان يوم الواقفه .
المجند – حضرتك بعت البوكس مشوار للمديرية .
علاء – اطلبوا ع الجهاز انت فين يا ....... امك ساعه تعالي بسرعه ع القسم
يدخل مخبر ياباشا الناس بترمي نفسها من شبابيك الفندق والدنيا مقلوبه هناك والناس عاملين غاغه والفندق فيه اجانب .
علاء - يالا بينا يا ابو حنفي مادام فيها اجانب تبقي الدنيا حتتقلب خلي امين النظام يوقف لنا تاكسي او ميكروباص اما نشوف المصيبة دي كمان محنا مورناش حاجه غير وجع القلب الناس تروح فنادق وتتبسط واحنا منعرفش نستريح لا ليل ولا نهار ربنا يتوب علينا من القرف ده شغلانه تقصر العمر
عمر عفيفي
والي اللقاء في الحلقه القادمه

نقلا عن الوعى المصرى